Эдийн засгийн өсөлтийг дэмжиж ядуурлыг бууруулах стратеги

Эдийн Засгийн Өсөлтийг Дэмжиж Ядуурлыг Бууруулах Стратеги нь Монгол Улсын Засгийн Газрын дунд хугацаанд эдийн засгийн өсөлтийг хурдасгаж, ядуурлыг бууруулах чиглэлээр баримтлах бодлогын үндсэн чиглэлийг агуулсан стратегийн баримт бичиг юм. Монгол улс 1990 оноос зах зээлийн эдийн засагт суурилсан, хүний эрхийг дээдэлсэн иргэний ардчилсан нийгмийг цогцлон байгуулах их үйлсийг эхэлж, улмаар нийгмийн амьдралын бүх хүрээг хамарсан өөрчлөлт, шинэчлэл хийж, зах зээлийн эдийн засгийн харилцаанд шилжих үйл явцыг эргэлт буцалтгүй сонгосон билээ. Ардчилал, шинэчлэл, өөрчлөн байгуулалтын сүүлийн 10 гаруй жилд Монгол улс олон улсын банк, санхүүгийн байгууллага, хандивлагч орнуудын дэмжлэг туслалцаатайгаар макро эдийн засгийн тогтвортой суурийг бүрдүүлж, хувийн хэвшилд тулгуурласан нээлттэй эдийн засгийн бүтцийг бий болгоход ихээхэн амжилт олсон. Дунд хугацааны эдийн засгийн өсөлтийг жилийн 5.5 хувьд хүргэхийг зорьж байгаа бөгөөд эдийн засаг дахь бүтцийн өөрчлөлтийг эрчимжүүлэн төрийн албаны шинэчлэл,төсвийн зарлагын удирдлагыг сайжруулж, нийгмийн халамжийн сүлжээг боловсронгуй болгон төрөөс үзүүлэх үйлчилгээний чанарыг дээшлүүлэх зорилт тавьж байна.