Жагсаал, цуглаан хийх эрх чөлөөний тухай хуулийн төсөл (2024 оны 4 сард нийтэлсэн хувилбар)-д өгөх ННФ-ын санал

Хуран цуглаж, үзэл бодлоо илэрхийлэх боломжтой байх нь ардчиллын нэг чухал суурь, иргэний оролцооны нэг хэлбэр юм. Ардчилсан нийгмийн иргэд ганцаар болон бусадтай эвлэлдэн нэгдэж, үзэл бодлоо илэрхийлэхэд ямар нэг зохицуулалт шаардлагагүй бөгөөд “олон нийтийн арга хэмжээ, цуглааны хяналтыг цагдаагийн үйл ажиллагааны хуулиар, харин эдгээртэй холбоотой эрхийг захиргааны ерөнхий хуулиар зохицуулж болох тул жагсаал, цуглааны асуудлаар тусгайлсан хууль гаргах зайлшгүй шаардлага байхгүй”.1 “Тайвнаар жагсаж цуглах зэрэг суурь эрхээ “эдлэх явцад нийтийн хэв журамд аюултай нөхцөл бий болж, төрийн оролцоо шаардлагатай болсон” 2 тохиолдолд л төр зөвхөн хуульд заасан үндэслэл, журмын дагуу оролцох боломжтой болох тул дэлхийн ихэнх улс жагсаал, цуглааны тусгайлсан хууль батлан, хэрэгжүүлж байна. Улмаар тайван жагсаал, цуглаан хийх эрхтэй холбоотой аливаа хууль, журам нь мөн чанартаа иргэд жагсаж, цуглах эрхээ хэрхэн эдлэх тухай бус, харин энэ эрхээ эдлэх явцад төр хэрхэн оролцох тухай зохицуулалт юм.