Инфляцийн эсрэг макро эдийн засгийн бодлого

Манай улсын инфляцид мөнгөний нийлүүлэлт, төсвийн цалингийн өсөлт, бензиний үнэ нөлөөлж байгаа ч эдгээрийн цаана эдийн засгийн салбарын онцлогоос хамаарсан мөчлөгийн нөлөөлөл нуугдаж байна. Салбарын бүтцээс хамаарч байгаагийн тод илрэл нь инфляцийн сар, улирлын хэлбэлзэл юм. Тиймээс мах, гурил, нефть бүтээгдэхүүний үнийг тогтворжуулснаар инфляцийг шийдэж чадахгүй. Харин инфляцитай “тэмцэхийн тулд” эдийн засгийн бүтцийг өөрчлөхөд чиглэсэн урт хугацааны цогц бодлого авч хэрэгжүүлэх шаардлагатай байна. Гэхдээ инфляцийг “зөөлрүүлэх” зорилготой богино хугацааны бодлогын арга хэмжээ, дунд хугацаандаа үр дүнгээ өгөх цаашдын эдийн засгийн бүтцийн өөрчлөлтийг дэмжих дунд хугацааны бодлого урт хугацаандаа эдийн засгийн бүтцийг байгаль орчин болон гадны зах зээлээс аль болох хараат бус болгон өөрчлөхөд чиглэсэн харилцан уялдаатай бодлого авч хэрэгжүүлбэл үр дүнгээ өгөх болно гэж ННФ-ын бодлогын судлаач, СЭЗДС-ийн Экономикс, эконометриксийн тэнхмийн эрхлэгч, доктор Ц.Батсүх судалгаанд тулгуурлан дүгнэлт гаргажээ.