Хэрэглэгчийн үнэлгээний картын арга

Ядуурлыг бууруулах бодлогыг амжилттай хэрэгжүүлэхийн нэг үндэс бол тухайн бодлогын хэрэгжилтийн явц, үйл ажиллагаанд хяналт тавьж, ядуурлын талаар судалгаа явуулж, шинжилгээ хийх улмаар бодлого боловсруулагч нарын чадавхийг бэхжүүлэх явдал юм. Тийм ч учраас дээрх зорилтыг хэрэгжүүлэхийн тулд энэ төслийн хүрээнд Санхүү, эдийн засгийн яамны дэргэд Ядуурлын судалгааны нэгжийг байгуулсан. Ядуурлын судалгааны нэгжээс дээрх зорилгын хүрээнд сүүлийн жилүүдэд хэд хэдэн судалгааг амжилттай явуулсны зэрэгцээ, ядуурлын судалгааны арга зүйн талаар гарын авлага материал боловсруулан хэрэглэгч нарыг хангах зорилт тавин ажиллаж байна. Үүний нэг нь “Хэрэглэгчийн үнэлгээний картын арга” болно. Сэдэвчилсэн судалгааны ажлын үндсэн дээр энэхүү гарын авлагыг боловсруулж Та бүхэнд танилцуулж байна. Төрөөс хүн амд үзүүлж буй зарим төрлийн үйлчилгээний чанар, хүртээмжийн байдлыг судалгааны дээрх аргыг ашиглаж судалснаар тухайн үйлчилгээг хүртэгчийн зүгээс хүлээн авч байгаа үйлчилгээний талаар өгч буй үнэлгээний дүнг үйлчилгээг үзүүлэгчдэд эргэн хүргэдгээрээ онцлог юм. Үйлчилгээний хүртээмж, чанарын талаарх судалгааны энэ арга нь оролцооны судалгааны аргын нэг хэлбэр болно. Судалгааны энэ арга нь үйлчлэгч, үйлчлүүлэгчдийн хоорондын уялдааг сайжруулж, тэдний харилцааны эргэх холбоог шуурхай хангадаг учраас сүүлийн үед судалгааны нэлээд олон улс оронд өргөн хэрэглэж байна. Дэлхийн банкнаас ч энэхүү аргыг хэрэглэх талаар хөгжиж буй орнуудад зөвлөж байгаа болно.