Төрийн байгууллагын вэбсайтын мэдээллийн ил тод байдал: Мониторингийн тайлан

Сайн засаглалын нэгэн гол шинж чанар бол төрийн байгууллага үйл ажиллагаагаа олон нийтэд ил тод байлгах явдал билээ. МУЗГ-аас 2008 онд 143 дугаар тогтоолоор төрийн удирдлагын ил тод, нээлттэй, хариуцлагатай, ёс зүйтэй, ажил хэрэгч байдлыг хангаж, төр, иргэний харилцан итгэлцлийг бэхжүүлэх зорилго бүхий “Ил тод байдлыг илтгэх шалгуур үзүүлэлт”-ийг Засгийн газрын 143 дугаар тоот тогтоолоор (цаашид “Тогтоол” гэх) батлан уг шалгуур үзүүлэлтийг хангах арга хэмжээ авч ажиллахыг Засгийн газрын гишүүн, Засгийн газрын агентлагийн дарга, бүх шатны Засаг дарга нарт үүрэг болгосон байдаг. Уг тогтоолд төрийн байгууллагын ил тод байдлыг хангахдаа байгууллагын үйл ажиллагаа, хүний нөөц, төсөв санхүү болон худалдан авах үйл ажиллагаатай холбоотой тодорхой мэдээллийг байгууллагын албан ёсны вэбсайтанд байршуулсан байхаар заасан юм.

Энэхүү тогтоолын заалтууд хэрхэн хэрэгжиж байгааг үнэлж, дүгнэх зорилгоор 2010 онд IRIM судалгааны хүрээлэн Авилгатай Тэмцэх Газрын (АТГ) захиалга, НҮБХХ-ийн дэмжлэгтэйгээр Засгийн газрын байгууллагын вэбсайтад нээлттэй мэдээллийн мониторинг хийсэн бөгөөд төрийн байгуулагын үйл ажиллагаанд нь дэмжлэг үзүүлэх зорилгоор АТГ-тай хамтран судалгааны үр дүнг танилцуулах хэд хэдэн уулзалт зохион байгуулсан. Энэ удаа судалгааны хүрээгээ өргөтгөж Монгол Улсын төрийн 100 байгууллагын албан ёсны вэбсайтад мониторинг хийснээ танилцуулж байна.