Naranchuluun Ардчилсан намаас Ерөнхийлөгчид нэр дэвшигч, УИХ-ын гишүүн М.Энхсайхан өчигдөр хэвлэлийн бага хурал хийлгэж сонгуулийн кампанит ажлаа эхэлсэн байна. Тэрбээр энэ үеэр нэр дэвшигчдийн хувьд хариуцлагаа мэдэрсэн, улс орны хувьд ардчиллыг нэг шат ахиулсан сонгууль болно гэж мэдэгджээ. М.Энхсайхан дээрх үгийг хэлэхдээ энэ удаагийн Ерөнхийлөгчийн сонгуульд хэнийг гаргахыг ард түмний шударга сонголт мэднэ. Гэхдээ эцсийн эцэст хэн ч ялсан байсан ард түмэн хожсон байгаасай, тэдний сонголт үнэн бөгөөд шударга байна гэж онцолсон хэмээн «Өдрийн сонин» /¹083/ мэдээлжээ.
М.Энхсайхан арван зүйлийг тусгасан мөрийн хөтөлбөрийг сонгогчдын хүсэл эрмэлзэл, санал бодолд тулгуурлан дэвшүүлсэн гэж мэдэгджээ. «Өдрийн сонин»-д тэмдэглэснээр тэрбээр үе үеийн Монголын төрийн тэргүүн нарын бодлогын залгамж болсон улс орон, ард түмний эв нэгдлийг юун түрүүнд эрхэмлэж үүнийг хангаж ажиллана гэжээ. Мөн УИХ-ын 2004 оны сонгуулийн дүнг хүндэтгэн төр, засгийн мөрийн хөтөлбөрийг дэмжин ажиллахаа амласан байна. Түүний мөрийн хөтөлбөр дэх шинэ агаад гол зүйл нь авилгал, хээл хахуультай тууштай тэмцэх явдал аж. Энэ тэмцлийн гол арга нь авилгачдад хатуу цээрлэл үзүүлэх явдал гэж М.Энхсайхан үзэж байна.
М.Энхсайхан өдгөө УИХ-ын Аюулгүй байдал, гадаад бодлогын асуудлыг хариуцаж байгаагийн хувьд улс орны тусгаар тогтнол, аюулгүй байдалд нэлээд анхаарч өнөөг хүртэл манай оронд энэ талын шинэ концепци гаргаж ирээгүйг дурдаад энэ ажлыг амжуулахаа амлаад Монгол Улсын өнөөгийн гүйцэтгэж буй энхийг сахиулагчийн үүргийг эрчимтэй барьж ажиллана гэж мэдэгджээ. Тэрбээр мөрийн хөтөлбөртөө шүүх засаглалын асуудлыг орхисонгүй. Өнөөдөр зөвхөн мөнгөтэй хүмүүст үйлчилж буй шүүхийг ард түмний болгоход анхаарч ажиллана гэжээ. Бас улстөрийн нам, хүчнүүдийн ажил хэрэгч хамтын ажиллагааг хангаж ажиллана. Ерөнхийлөгчид нэр дэвшигчийн хувьд иргэдийн сүсэг бишрэлийн асуудал анхаарлын гадна үлдэх ёсгүй гэж хэлсэн ажээ.
Ардчилсан намаас нэр дэвшигчид зөвлөмж өгч байх зөвлөлдөх хороо болон санхүүжилтийн хороог тус намын дарга Р.Гончигдорж ахлахаар болжээ. Нэр дэвшигч М.Энхсайханы сонгуулийн өрөнхий менежерээр УИХ-ын гишүүн асан Ё.Гэрэлчулуун, сэтгүүлч Чунтын Чулуунбаатар, хэвлэлийн төлөлөгчөөр сэтгүүлч А.Баатархуяг нар ажиллахаар болсон байна.
