Naranchuluun Өчигдөр нэр дэвшигчид үнэмлэхээ гардсны дараа сэтгүүлчдийн товч асуултад хариулт өгсөн байна. Хамгийн түрүүнд МАХН-ын намын дарга Н.Энхбаяр нэр дэвшигчийн үнэмлэхээ гардсан байна. Тэрбээр бусад нэр дэвшигчдээ бүгдийг өөрийн өрсөлдөгч хэмээн хэлсэн аж. Харин өрсөлдөгчдөдөө хандан хийж бүтээснээрээ, хийж бүтээхээрээ шударга өрсөлдье хэмээн уриалсан байна. Хэрэв Ерөнхийлөгчөөр сонгогдвол ажлаа юунаас эхлэх вэ гэсэн асуултад тэрбээр хариулахдаа, хамгийн гол нь шударга ёсны төлөө ажиллана. Аль нэг аймаг, нам, бүлгийн харьяалал бодолгүйгээр өөрт байгаа хүчээ дайчилж ард түмнээ тавтай сайхан амьдруулах, эрүүл саруул байлгах, мэдлэг боловсролтой болгох, өөрөөр хэлбэл, найдвартай, баталгаатай амьдралтай байлгахын төлөө ажиллана гэж хэлсэн байна.
МАХН-аас нэр дэвшсэн Н.Энхбаярын дараа БНН-аас нэр дэвшсэн БЖаргалсайхан үнэмлэхээ гарджээ. Тэрбээр Монгол Улсын Ерөнхийлөгч болбол хамгийн түрүүнд Монголд шударга ёсны тогтолцоог тогтоох, өнөөгийн нийгэмд бий болсон ядуурлын асуудлыг нэн даруй шийдвэрлэж дуусгахад түлхүү их анхаарч ажиллана гэжээ. Мөн бусад нэр дэвшигчдэд хандан сонгуульд шударгаар оролцохыг уриалсан байна.
"Эх орон" намаас нэр дэвшигч Б.Эрдэнэбат 03 тоот үнэмлэхийг авсан байна. Тэрбээр гол өрсөлдөгчөөрөө нөгөө гурван нэр дэвшигчээ нэрлээд Ерөнхийлөгч болбол Монгол Улсын Ерөнхийлөгчийн хуулийн хүрээнд үйл ажиллагаа явуулна гэж мэдэгджээ. Нэрээ татах эсэх тухайд хариулахдаа, манай намынУлс төрийн зөвлөлийн шийдвэр гаргах ёстой. Одоогоор тийм шийдвэр гараагүй, тийм тохиролцоо ч байхгүй хэмээн мэдэгдсэн байна.
Хамгийн сүүлд Ардчилсан намаас нэр дэвшигч М.Энхсайхан үнэмлэхээ гарджээ. Тэрбээр энэ сонгуулийн эцсийн дүнд ард түмэн ялагч байгаасай хэмээн тэмдэглээд өөрийнхөө гол бөгөөд хамгийн хүчтэй өрсөлдөгчөөр Н.Энхбаярыг нэрлэсэн байна.
