Naranchuluun Үндэсний телевиз, радиогоор сурталчилгаа явуулах журам, хуваарийг баталжээ (2005.04.08)
Сонгуулийн ерөнхий хорооноос Ерөнхийлөгчийн сонгуулийн сурталчилгааг Монголын үндэсний телевиз, радиогоор явуулах журам, хуваарийг баталсан байна. Монгол Улсын Ерөнхийлөгчийн сонгуулийн хуулийн 28 дугаар зүйлд заасны дагуу сонгуульд оролцох намуудын нэр дэвшигчдэд төлбөртэй ба төлбөргүй нэвтрүүлэг хийх адил хэмжээний цаг олгодог. Нэр дэвшигчийн сурталчилгааг 2005 оны дөрөвдүгээр сарын 5-наас эхэлж тавдугаар сарын 20-ны өдрийг дуустал явуулахаар тогтоосон байна.
Төлбөргүй цаг:
Төлбөргүй цаг олгохдоо нэр дэвшигч бүрт телевизийн нэвтрүүлэгт нэг удаа 20 минутын хугацаатай зургаан удаагийн 120 минутын нэвтрүүлэг, сурталчилгааны хаалтын нэвтрүүлэг нэг удаа арван минут, нийт 130 минутын нэвтрүүлгийн цаг олгохоор болж, нэр дэвшигчдийн сонгогчидтой хийх уулзалт зэрэг үйл явдлын сурвалжлагыг "ММ" агентлагийн мэдээллийн хөтөлбөрөөр тусгай хуваарийн дагуу мэдээлэхээр заасан байна.Нэр дэвшигч бүр радиогийн 30 минутын шууд нэвтрүүлэгт хоёр удаа нийт 60 минутын хугацаатай оролцох болжээ. Мөн гурван удаагийн буюу нийт 60 минутын тусгай нэвтрүүлгийг төлбөргүй явуулах аж.
Нэр дэвшигч бүрийн сонгуулийн сурталчилгааны нээлт, хаалтын талаар арван минутад төлбөргүй мэдээлэх бөгөөд сонгогчидтой хийх уулзалтыг мэдээний цагаар хоёр минут хүртэлх хугацаанд тогтмол төлбөргүй явуулна. Нэр дэвшигч хүсвэл нэмэгдэл мэдээллийг хоёр минутаар сунган төлбөртэй явуулж болох аж.
Төлбөртэй цаг:
Төлбөртэй цаг олгохдоо Үндэсний телевиз, радиогоор нэр дэвшигчийн талаарх бусад нэвтрүүлэг, сурталчилгааг тогтоосон тарифын дагуу төлбөртэй хийнэ. Төлбөртэй цаг нь телевизэд тус бүр нь 20 минутын хугацаатай 12 удаагийн нэвтрүүлэг явуулах, радиод тус бүр 20 минутын хугацаатай 25 удаагийн нэвтрүүлгийн цаг олгох юм байна.
Телевизийн төлбөртэй болон төлбөргүй нэвтрүүлгүүд долоо хоног бүрийн даваа, мягмар, пүрэв, баасан гаригт намууд ээлжлэх байдлаар цацагдана. Энэхүү журам, хуваарьт нам, нэр дэвшигчээс явуулах нэвтрүүлэг нь сонгуулийн эсрэг агуулгатай байж болохгүй ажээ.
