МҮЭ-үүдийн холбоо Ерөнхийлөгчид нэр дэвшигчдэд хандан 10 зүйл санал дэвшүүлэв (2005.04.11)

МҮЭ-үүдийн холбоо Ерөнхийлөгчид нэр дэвшигчдэд хандан 10 зүйл санал дэвшүүлэв (2005.04.11)

МҮЭ-үүдийн холбооноос улс орны нийгэм, эдийн засгийн өнөөгийн байдал, иргэд хөдөлмөрчдийн санал, шаардлагад үндэслэн Ерөнхийлөгчид нэр дэвшигчдэд хандан сонгуулийн хөтөлбөрт нь тусгуулахаар 10 зүйл саналыг дөрөвдүгээр сарын 7-нд илгээсэн байна. МҮЭ-үүдээс дэвшүүлсэн саналуудыг хүлээн авч, мөрийн хөтөлбөртөө тусгасан нэр дэвшигчийг МҮЭ-үүдийн холбоо дэмжиж, хамтран ажиллахаа мэдэгджээ.

Эдгээр 10 зүйл санал нь:

1.Хөдөлмөрчдийн язгуур эрх ашгийг хамгаалахад дэмжлэг үзүүлж, тэдний хөдөлмөрийн хүрээний үндсэн эрх, эрх чөлөөг бүрэн эдлэх бодит нөхцөл, боломжийг бүрдүүлэх үүднээс Монгол Улсын хууль тогтоомж, ялангуяа хөдөлмөрийн харилцаа, нийгмийн хамгааллын холбогдолтой хууль тогтоомжийн хэрэгжилтийг бүрэн хангуулж, хууль тогтоомжийг зөрчсөн гэм буруутай этгээдэд хүлээлгэх хуулийн хариуцлагыг чангатгах.

2.Баялагийг бүтээгч хөдөлмөрийн хүний цалин хөлс, нийгмийн даатгал болон нийгмийн халамжийн сангаас олгож буй тэтгэвэр, тэтгэмжийн хэмжээг жил бүр индексжүүлэн мэдрэгдэхуйц нэмэгдүүлэх.

3.Хөдөлмөр эрхлэлтийг нэмэгдүүлэх, ажилгүйдэл, ядуурлыг бууруулах, нийгмийн хамгааллыг сайжруулахад чиглэсэн нийгэм, эдийн засгийн цогц бодлого хэрэгжүүлэх.

4.Нэмэгдсэн өртгийн албан татварын хувь хэмжээг бууруулж, үйлдвэрлэл эрхлэгчдийг дэмжин, ажлын байрыг нэмэгдүүлж баталгаажуулах.

5.Нийгмийн баялагийн шударга хуваарилалтыг бий болгож, иргэд, хөдөлмөрчид хөдөлмөрийнхөө үр шимийг шударга хүртэх боломжийг бүрдүүлэх.

6.Хөдөлмөр, нийгмийн зөвшлийн гурван талт улсын хэлэлцээрийг хууль эрхзүйн дагуу хугацаанд нь байгуулж, иргэд, хөдөлмөрчдийн хөдөлмөрлөх эрх, түүнтэй холбогдсон нийгэм, эдийн засгийн эрх, ашиг сонирхлыг нь хамгаалахад дэмжлэг үзүүлэх.

7.Байгалийн баялгийг хамгаалах, зохистой ашиглах, нөхөн сэргээх бодлогыг хэрэгжүүлж, иргэдийн эрүүл, аюулгүй орчинд амгалан тайван амьдрах нөхцөл боломжийг бурдүүлэх.

8.Иргэдэд төрөөс узүүлж буй боловсрол, эрүүл мэнд зэрэг нийгмийн салбарын үйлчилгээний чанар, хүртээмжийг сайжруулж, шинэ шатанд гаргах.

9.Төр, захиргааны байгууллагуудын үйл ажиллагаанд ардчилсан ёс, шударга ёс, тэгш байдал, хууль дээдлэх, үндэсний эв нэгдлийг хангах зарчмыг бүрэн хэрэгжүүлэх.

10.Нийгмийн бүх шатанд нүүрлэн урхагшиж байгаа авилгал, хээл хахууль, хүнд суртал, хүчирхийлэлтэй тууштай тэмцэх зэрэг болно.