Naranchuluun  |
"АРДЧИЛЛЫГ ШИНЭЭР БОЛОН СЭРГЭЭН ТОГТООСОН ОРНУУДЫН ОЛОН УЛСЫН V БАГА ХУРЛЫН ШИЙДВЭРИЙГ ХЭРЭГЖҮҮЛЭХ" ТӨСӨЛ |
 |
ХЭЛЭЛЦҮҮЛЭГТ ОРОЛЦОХЫГ УРЬЖ БАЙНА
АШСТО-ын олон улсын V бага хурлын шийдвэрийг хэрэгжүүлэх төслийн хүрээнд боловсруулж буй "Монгол Улсад ардчиллыг бэхжүүлэх үндэсний үйл ажиллагааны хөтөлбөр"-ийн төслийн эхний хэлэлцүүлэгт төр, олон нийтийн байгууллагууд, иргэдийг өргөнөөр оролцохыг урьж байна.
2005 оны 6-р сард болох "Монгол дахь ардчиллын төлөв байдал" үндэсний хэмжээний бага хурлаар батлахаар төлөвлөж буй уг хөтөлбөрт Монгол Улсад ардчилал, сайн засаглал, иргэний нийгмийг бэхжүүлэх тодорхой ажлуудыг санаачилж, хэрэгжүүлэх арга замыг дэвшүүлж байгаа юм.
Хөтөлбөрийн төслийг боловсруулсан судлаачдын баг /Улс төрийн боловсролын академийн захирал, доктор Д.Ганбат, Философи, социологи, эрх зүйн хүрээлэнгийн захирал, доктор Г.Чулуунбаатар, МУИС-ийн Нийгмийн ухааны сургуулийн ахлах судлаач Д.Ганхуяг, Удирдлагын академийн Төрийн удирдлагын тэнхимийн эрхлэгч, докторант П.Доржсүрэн, МУИС-ийн Хууль зүйн сургуулийн багш, докторант Х.Тэмүүжин/, төслийн зөвлөх Х.Хуланнархэлэлцүүлэгт оролцогчдын саналыг авч, сонирхсон асуултад хариулна.
Нээлттэй хэлэлцүүлэг 4 сарын 15-нд 10:00-13:00 цагт Хууль эрх зүйн үндэсний төвийн (Төрийн ордны баруун талд) хурлын танхимд болох тул сонирхсон албан байгууллага, ард иргэд өргөнөөр оролцоно уу.
Мэдээлэл авах утас: 319603
Вэб : www.icnrd5-mongolia.mn
|
“МОНГОЛ УЛСАД АРДЧИЛЛЫГ БЭХЖҮҮЛЭХ ҮНДЭСНИЙ ҮЙЛ АЖИЛЛАГААНЫ ХӨТӨЛБӨР”-ИЙН ТАНИЛЦУУЛГА Ардчиллыг шинээр болон сэргээн тогтоосон орнуудын олон улсын V бага хурлын шийдвэрийг хэрэгжүүлэх төслийн хүрээнд тус Бага хурлын өмнө Монгол Улсын хүлээсэн үүргийн дагуу энэ хөтөлбөрийн төслийг үндэсний судлаач экспертүүдийн баг боловсруулав. Хөтөлбөрийн зорилго нь Монгол Улсад хүний эрх, эрх чөлөөг хүндэтгэн, хариуцлага болон эрх зүйн хэм хэмжээг хангасан, шудрага, хариуцлагатай, бүх талыг хамарсан оролцоо бүхий, нээлттэй, ил тод нийгмийг цогцлон бүтээх замаар ардчиллыг бэхжүүлэхэд оршино. Төслийг боловсруулахдаа сүүлийн жилүүдэд нийгмийн ухаан, түүний дотор улс төр судлаачдын боловсруулсан ардчиллын хэрэгжилтийн “чанарын” асуудлыг судлах арга зүйг үндэс болгож, эрх чөлөө, эрх зүйт төр (хуульт ёс), хариуцан тайлагнах босоо тогтолцоо, үүрэг хариуцлага, тэгш байдал, оролцоо, өрсөлдөөн, хариуцан тайлагнах хэвтээ тогтолцоо зэргийг хэмжүүр болгов. Чингэхдээ ардчиллыг систем хэмээн үзэх үзэлд тулгуурлаж, аль нэг бүрэлдэхүүн хэсэгт гарах ахиц нь бусад хэсэгт эерэг нөлөө үзүүлдэг харилцан хамаарлын асуудлыг гол болголоо. Хөтөлбөр нь бүтцийн хувьд: а) Монгол дахь ардчиллын хүрсэн түвшин, өнөөгийн байдал, тулгамдсан асуудлын талаарх судалгаа, дүгнэлтийн тойм, хөтөлбөрийг боловсруулсан арга зүйн товч тайлбарыг багтаасан танилцуулга, б) Ардчиллын “чанарыг” илэрхийлэх хэмжүүр, үзүүлэлтийг тусгасан “Бүх талын оролцоо”, “Олон ургальч үзэл ба шударга өрсөлдөөн”, “Хууль дээдлэх ёс, эрх зүйт төр”, “Ажил үүргээ хариуцан тайлагнах босоо тогтолцоо”, “Хариуцлага, харилцан хяналтын хэвтээ тогтолцоо” гэсэн үндсэн таван бүлгээс бүрдэнэ . Бүлэг бүрийн эхэнд “хүрсэн төвшин”, “сорилт”, “тэргүүлэх хүрээ”, “хүрэх төвшин”-г хураангуйлж өгсөн нь ардчиллын тухайлсан хэмжүүрийн жам ёсны утгын бодит агуулгыг илэрхийлж байгаа юм. Хөтөлбөрийн бүлэг бүрийг матрицид оруулан хүснэгтэлж 1) сорилт, асуудлууд, 2) үйл ажиллагааны чиглэл, зорилт, 3) хугацаа, 4) хийх ажил, 5) үр дүн, 6) хариуцах эзэн гэсэн задаргаагаар нарийвчлан тодорхойлсон болно. Хөтөлбөрт тусгагдсан үйл ажиллагаануудыг хэрэгжүүлэх хугацааг ойрын (1-2 жил), дундын (3-4 жил), хэтийн (5-аас дээш жил) хэмээн хуваалаа. Хөтөлбөрийн төслийг 2005 оны 1 дүгээр сарын 29 ба 3 дугаар сарын 10-нд тус тус судлаачид, улс төрчид, иргэний нийгмийн төлөөллийн уулзалт ярилцлагаар хэлэлцүүлж, гарсан санал, дүгнэлтийг тусган засварласан болно. |
