Газрын шинэтгэлийн хэрэгжилтэд мониторинг хийх нээлттэй тэтгэлэгт уралдаан

  1. Naranchuluun
  2. 2003-12-04
  4. 609 уншсан
  5. 1 минут уншина
A- A A+
Газрын шинэтгэлийн хэрэгжилтэд мониторинг хийх нээлттэй тэтгэлэгт уралдаан


Монголын Нээлттэй Нийгэм Хүрээлэн/Нээлттэй Нийгэм Форум
Газрын шинэтгэлийн хэрэгжилтэд мониторинг хийх
нээлттэй тэтгэлэгт уралдаан

Бодлого боловсруулалт, хэрэгжилтэд хяналт тавихад олон нийтийн оролцоог хөхүүлэн дэмжих зорилгоор Нээлттэй Нийгэм Форумаас төрийн бус болон хэвлэл мэдээллийн байгууллагуудын дунд газрын шинэтгэлийн хэрэгжилтэд мониторинг хийх тэтгэлэгт уралдаан зарлаж байна. Тэтгэлэгт уралдааны хүрээнд (а) газрын шинэтгэлийн хүрээнд гарч буй амжилт, иргэдийн эдийн засгийн болон бусад эрхийг зөрчиж болзошгүй маргаантай нөхцөл байдлын талаарх баримт мэдээллийг олж цуглуулах, (б) амжилт ололт болон алдаа дутагдал нь иргэд, бусад сонирхол бүхий талуудад үзүүлж буй үр нөлөөг үнэлэн дүгнэх, (в) төрийн байгууллагын зүгээс дээрх зөрчил дутагдлыг засч залруулах талаар авч хэрэгжүүлж буй болон хэрэгжүүлбэл зохих арга хэмжээг дүгнэн шинжлэх зэрэг үйл ажиллагааг хэрэгжүүлнэ.

Мониторингийн үйл ажиллагаанд дараахь зүйлс орсон байна. Үүнд:

  • Мониторингийг гүйцэтгэх төлөвлөгөө боловсруулах, тухайлбал зорилтоо тодорхойлох, асуудлыг тодотгон томъёолох, гол тоглогчдыг тодруулах, мэдээллийн хэрэгцээ шаардлагыг тогтоох, хууль тогтоомж болон хийгдсэн дүн шинжилгээг тоймлон шинжлэх, судалгааны арга хэрэгсэл, аргачлалаа сонгох, мониторинг явуулах багаа бүрдүүлэх болон сургах зэрэг зохион байгуулалтын болон бусад арга хэмжээг төлөвлөсөн байвал зохино. Баримт мэдээлэл цуглуулахад тустай төрөл бүрийн удирдамж, маягтуудыг боловсруулах шаардлагатай.
  • Газрын шинэтгэлтэй уялдан гарч буй амжилт, зөрчлийн талаар өгөгдөл, мэдээлэл цуглуулах. Үүнд ярилцлага, үйл явдлыг ажиглах, газар дээр нь очиж судлах, кейс жишээ, хоёрдагч мэдээлэл, баталгаажуулах баримт цуглуулах болон бусад аргыг ашиглана.
  • Ололт, баримтад дүн шинжилгээ хийх болон үнэлгээ өгөх. Ялангуяа гарсан зөрчлийг авч үзэж, яагаад үүссэн болон бодлого боловсруулах, хэрэгжүүлэх шатанд нэн ялангуяа төрийн байгууллагын зүгээс цаашид ямар арга хэмжээг хэрэгжүүлэх шаардлагатай болохыг дүгнэн шинжилж, санал зөвлөмж гаргана.
  • Бичгийн тайлан, олон нийтийн арга хэмжээ, хэвлэл мэдээллийн хэрэгсэлтэй ажиллах замаар ололт, санал зөвлөмжөө тайлагнах буюу танилцуулна.

Тэтгэлгийг олгох байгууллагыг сонгохдоо дараахь шалгуурыг анхааран үзэх болно. Үүнд:

  • Хүний эрх, бодлого судлал, мониторинг болон нөлөөллийн чиглэлээр өмнө хуримтлуулсан туршлага, идэвхтэй үйл ажиллагаа
  • Цаашид байгууллагын хувьд өсөх үзэл баримтлал, төлөвлөгөө
  • Мэргэжлийн өндөр ур чадвартай, ажил хэрэгч удирдлага, ажилтантай байх
  • Хурц асуудлаар аль нэг талыг үл баримтлан, тэнцвэртэй ханддаг, нэр хүндтэй байх
  • Төсвийн тооцоо

Мониторингийн үйл ажиллагаа нь хөдөө орон нутаг, хот суурингийн аль алиных нь хувьд, мөн засаг захиргааны нэгжийн түвшин бүрийн хувьд хийгдэх ёстой. Өргөдөл гаргагчид тодорхой аймаг, бүс нутгийг, эсвэл нийт улсыг хамрахаар сонгож болно. Тэтгэлгийн хугацаа 2004 оны 1 дүгээр сараас эхлэн нэг жил үргэлжлэх болно.

Тэтгэлэг авсан байгууллага нь сонирхол бүхий талууд, олон нийтэд олж мэдсэн зүйлс болон нийт мониторингийн үйл явцын талаар тодорхой хугацаанд танилцуулга хийх буюу тайлангаа бичгээр гаргах шаардлагатай.

Өргөдөл гаргагчид доорх хаягаар дараахь материалыг өгөх шаардлагатай. Үүнд:

  • Сонирхолоо илэрхийлсэн захидал
  • Албан байгууллагын гэрчилгээний хуулбар
  • Мониторингийн үйл ажиллагаа явуулах төсөл, үүнд аргачлал, хүний нөөц, мониторингийн цар хүрээ, гарах бүтээгдэхүүн/үр дүнгийн талаар дурдсан байна. (3 хуудсаас илүүгүй)
  • Төсвийн тооцоо
  • Утасны дугаар, и-мэйлийн хаяг зэрэг эргэн холбогдох мэдээлэл
  • Хэрэв байгаа бол урьд нь тодорхой эрхийн хүрээнд буюу үйл ажиллагааны хувьд хийсэн мониторингийн тайлан баримт

Утсаар мэдээлэл өгөхгүй. Илүү дэлгэрэнгүй удирдамжийг доорх хаягаар, мөн интернэтийн www.opensocietyforum.mn хаягаас авах боломжтой (Ажил үүргийн хуваарийг энд дарж үзнэ үү.). Бүх нэмэлт асуултыг [email protected] и-мэйлийн хаягаар явуулах боломжтой.

Өргөдлийг доорх хаягаар хүлээн авах бөгөөд сүүлийн хугацаа нь 2003 оны 12 дугаар сарын 22-ны өдрийн 18 цаг байна. Хоцорч ирсэн өргөдлийг шалгаруулалтад оролцуулахгүй.

Хаяг:
Нээлттэй Нийгэм Форум
Монголын Нээлттэй Нийгэм Хүрээлэн
ХасБанкны байр, Ерөнхий сайд Амарын гудамж
Сүхбаатар дүүрэг, Улаанбаатар хот, Монгол улс - 210646