Naranchuluun Ч.Тамир
(МУИС-ийн Социологийн тэнхмийн багш)
2004 оны тавдугаар сарын 17-ны өдөр бол улс төрийн намууд нэр дэвшигчдээ тогтсон байх эцсийн хугацаа юм. Сонгуулийн дүн нэр дэвшигчдээсээ ихээхэн хамаарна хэмээн сонгогчид нам, эвслийн шийдвэрийг хүлээж байгаа. Тийм ч учраас өдгөө нам, эвсэл нэр дэвшигчдийн хэрүүлийн алим болоод байгаа 76 тойргийн талаар энэ удаа өгүүлэхээр зорьлоо.
Сонгуулийн үр дүнд прогноз хийх явдал сүүлийн жилүүдэд судлаачдын анхаарлыг ихэд татаж байна. Энэхүү судалгааг наад зах нь нэгд, сонгогчийн зан үйлийн ангилал хэв шинж, хоёрт тойргийн хэв шинж, онцлогийн судалгаа, гуравт, сонгогчдын оролцоо, дөрөвт улс төрийн нам болон нэг дэвшигчдийн рейтинг, өгсөлт ба бууралт, тавд сонгуулийн бохир технологи, зургаад, сонгогчийн санал хуваалт зэргийг хослуулан цогцолбор байдлаар хийж байж сонгуульд ямар нам хүчин амжилт үзүүлэх вэ гэдэгт хариулт өгч чадах юм.
Бидний хувьд сонгогчийн зан үйлийн ангилал, хэв шинж, тойргуудын шилжих хөдөлгөөн зэргийн талаар өмнө нь нийтэлсэн билээ. Одоо бид сонгогчийн сонгуулийн оролцоо, сонгогчдын саналын тогтвортой байдал ба өөрчлөлт зэргийн талаар өгүүлье.
