Тусгай зөвшөөрлийн тоо гуравдугаар сард 73-аар нэмэгдэв (2008-05-26)

ЛИЦЕНЗ АЖИГЛАГЧ: Тусгай зөвшөөрлийн тоо гуравдугаар сард 73-аар нэмэгдэв (2008-05-26)

Н. Дорждарь ([email protected])
ННФ

Ашигт малтмал, газрын тосны хэрэг эрхлэх газраас 2008 оны 3-р сард тусгай зөвшөөрлийн бүртгэлд орсон өөрчлөлт, хөдөлгөөний талаарх мэдээллийг өөрийн шинэчилсэн вэб хуудсанд байрлуулжээ. Тиймээс энэ бүртгэлд чухам ямар өөрчлөлт орсон талаарх зарим баримтыг энд толилуулж байна.

Тухайн сард нийт 114 тусгай зөвшөөрөл шинээр олгогдож, 67 шилжиж, 63 сунгагдаж, 8 цуцлагдаж, 33 дуусгавар болсноор нийт хүчинтэй тусгай зөвшөөрлийн буюу лицензийн тоо 73-аар нэмэгджээ.

Шинээр олгосон тусгай зөвшөөрөл

Нийт 114 лицензийг 132 сумын нутаг дэвсгэрт шинээр олгосон байна. 11 ашиглалтын лиценз байгаа нь 11 суманд, 103 хайгуулын лиценз нь 121 сумын нутаг дэвсгэрт хамаарч байна.

Шинээр олгосон нийт лиценз 1,041,623 га (10416,23 хавтгай дөрвөлжин км) талбай газар нутгийг хамарч байгаагаас нэг хүрэхгүй хувь буюу 6957 га нь ашиглалтын лицензийн хамрах талбай юм.  

Хамгийн том талбай бүхий 10 лицензийг Хүснэгт 1-т үзүүлэв. Эдгээр нь бүгд хайгуулын лиценз юм. Харин ашиглалтын хамгийн том талбайг хамарсан лиценз нь Завхан аймгийн Дөрвөлжин суманд Баян Айраг Эксплорэйшн ХХК-ийн эзэмшиж буй 6102 га талбайг хамарсан алтны лиценз юм.  

Хүснэгт 1. Хамгийн том талбай бүхий 10 лиценз

Хамгийн олон лиценз Дорноговь, Өмнөговь аймгийн нутагт олгогдсон байна. Тухайлбал, Дорноговьд 31 лиценз шинээр олгогдсоноос 2 нь ашиглалтын, харин Өмнөговьд 28 хайгуулын лиценз олгогджээ. Хэнтий аймагт 8 лиценз олгогдсоноос 3 нь ашиглалтын байв. Нийт 11 ашиглалтын лицензийн 4 нь алт, 3 нь жонш, мөн тус бүр нэг нэг барилгын материал, нүүрс, төмөр, цагаан тугалга олборлох зөвшөөрөл байна. Мөн Улаанбаатар хотод ч 5 лиценз олгогджээ. Үүнээс 2 нь ашиглалтын зөвшөөрөл ба Маралмичид од компани Налайхад нүүрс, Сэлүүхэн компани Гишүүний аманд барилгын материал олборлохоор болсон байна.

Хүснэгт 2. Гуравдугаар сард хамгийн их лиценз олгогдсон сумд

Хүснэгт 3. Гуравдугаар сард хамгийн олон лиценз шинээр авсан компаниуд

Хүснэгт 4. Хамгийн их талбайд лиценз олгогдсон аймгууд (га-гаар)

Шилжсэн, сунгасан тусгай зөвшөөрөл

Нийт 67 лиценз нэг этгээдээс нөгөөд шилжсэн байна. Үүнээс 57 нь хайгуулын, үлдсэн 10 нь ашиглалтын лиценз байв. Зөвхөн нэг лицензийг хэсэгчилэн шилжүүлсэн ба үлдсэн бүх лицензийг бүхэлд нь шилжүүлсэн байна. Нийт 67 лицензийг 34 хуулийн этгээдээс 32 ХХК шилжүүлэн авсан байна. Хамгийн олон лиценз авсан, өгсөн компаниудын жагсаалтыг Хүснэгт 5-д үзүүлэв.

Хүснэгт 5. Гуравдугаар сард хамгийн олон тооны лиценз шилжүүлэгч, шилжүүлэн авагч компаниуд 

Сэлэнгэ аймгийн нутаг дэвсгэр дэх 12, Дорнод аймгийн 8, Дорноговь, Хэнтий аймгийн тус бүр 6 лицензийн эзэн солигджээ. Мөн Сэлэнгийн Ерөө суманд 5 лиценз эзнээ сольсон нь сумдын хувьд их тоо байна. 

Мөн нийт 38 аж ахуйн нэгжийн 63 тусгай зөвшөөрлийн хүчинтэй хугацааг гол төлөв 3 жилийн хугацаатайгаар сунгажээ. Төв, Дорноговь аймагт тус бүр 15, 14 ширхэг лицензийн хугацааг сунгажээ. ТройМонголиа-Алт Ресорсиз компаний 5, Бэрэнгруппын 4 лицензийг сунгасан нь хамгийн олон байна.

Цуцлагдсан буюу дуусгавар болсон тусгай зөвшөөрөл

243,331 га талбайг хамарсан хайгуулын 40, ашиглалтын 1, нийт 41 тусгай зөвшөөрлийг цуцалсан буюу дуусгавар болгосон байна. Үүнээс 33 лицензийн хугацаа дууссан бол үлдсэн 8 нь лицензийн төлбөр төлөөгүйгээс цуцлагджээ. Троймонголиа-Алт Ресорсиз, Геотрасс, Эрдэнэмонгол зэрэг компаниудын 3-4 лицензийн эрх дуусгавар болжээ. Дорноговь аймгийн Айраг, Сайхандулаан сумдын Баян-Уул хэмээх нутгийн 134377 га талбайг хамарсан хайгуулын лиценз нь дуусгавар болсон хамгийн том талбайтай лиценз байв. Хөвсгөл аймгийн Шинэ-Идэр сумын нутаг дэвсгэрт үйл ажиллагаа явуулахаар авсан Дарсун ХХК-ийн ашиглалтын лицензийг төлбөр төлөөгүйн улмаас цуцалсан байна.

Лиценз ажиглагч

Цаашид Нээлттэй Нийгэм Форумаас сар бүрийн лицензийн тоо хэмжээнд орж буй өөрчлөлтийг харуулсан ажиглагч хүснэгтийг гаргаж байх болно. Анхны ажиглалтыг Хүснэгт 6-д үзүүлэв.

Хүснэгт 6. Лицензийн хөдөлгөөнийг ажиглагч