Naranchuluun Үндэсний Аюулгүй байдлын зөвлөлд (Өдрийн сонин 2007.07.05)
Оюутолгой, Тавантолгойн ордыг гадаад, дотоодын компаниуд хөрөнгө оруулалт хийх төслийг Засгийн газар, үндэсний аюулгүй байдлын зөвлөл дэмжсэн тухай мэдээлэл сонин хэвлэлд нийтлэгдэн гарсан нь олон.
Нийтээс далд нууц, хэдэн эрх мэдэлтэй хүмүүсийн дунд хуйвалдаан хэлбэрээр зохион байгуулагдаж байна гэж үзэж иргэний нийгмийн нэр бүхий байгууллагууд эвсэн эсэргүүцлээ илэрхийлсэн. Газар түүний бүх эд баялаг нь Монголын ард түмний өмч. Энэ ард түмний өмчийн жинхэнэ эзэн болсон ард, иргэдээс нуун далдалж, нууц, хуйвалдааны аргаар хөрөнгө оруулалтын гэрээ гэгчийг Айвенхоу Майнз, Рио Тинто дээгүүр эрх мэдэлтэй албан тушаалтан голчилсон Энержи Ресурс гэх мэтийн гадаад, дотоодын хөрөнгө оруулагчтай Засгийн газрын хийсэн гэрээг бид маш хариуцлагагүй гэрээ болсон гэж үзэж эсэргүүцэж байгаагаа дахин илэрхийлж байна.
Монголчууд бид газар, түүний баялгаа эдэлж хэрэглэж амьдрах нь гарцаагүй. Бидэнд одоо Оюутолгой, Тавантолгой мэтийн том ордыг ашиглах хөрөнгө байхгүй нь бодитой үнэн. Гэхдээ энэ хэрэгцээ, шаардлагыг маань буруугаар ашиглан, ард олны баялгийг хууль ёсны эздээс нь далдуур шударга бус аргаар булаан авах гэж байгаа ямар ч үйлдлийг хүлээн зөвшөөрөх ёсгүй.
Оюутолгой, Тавантолгойн ордуудыг ашиглах хөрөнгө оруулалтын гэрээ хийх гэж байгаа одоогийн гэрээ, хууль эрх зүйн орчин бүрдээгүйг дараахь байдлаар нотолж байна. Үүнд:
1.Ашигт малтмалын тухай, Татварын тухай зэрэг нижгээд хуульд УИХ-ын дарга асан Ц.Нямдорж засвар хийсэн нь ҮХЦ-ийн дүгнэлтээр Үндсэн хуулийг зөрчсөн нь тогтоогдсон. Хууль зассан үйлдлийг нь Үндсэн хууль зөрчсөн гэж ҮХЦ дүгнэсэн. Тиймээс хүчин төгөлдөр эсэх нь үл мэдэгдэх хуулийн дагуу Хөрөнгө оруулалтын гэрээ байгуулах нь гэрээ байгуулж байгаа аль ч талд ашиггүй гэж үзэж байна.
2. Айвенхоу Майнзтай хийхээр Засгийн газраас дэмжлэг авсан гэрээнд Монгол Улсын хуулиас дээгүүр хүчинтэй байх тухай заалт орсон.
3.Айвенхоу Майнз компанийг гэнэтийн ашгийн 68 хувийн татвар болон Монголын ард түмэнд хэрэгтэй өөр олон төрлийн татвараас чөлөөлсөн.
4.Хөрөнгө оруулалтын гэрээг хийх танилцуулгын тавдугаарт “Энэхүү гэрээг УИХ-ын хаврын чуулганаар батлуулахгүй бол 2008 оны сонгуулийн үр дүнд шинээр байгуулагдсан Засгийн газар одоогийн эрх барьж буй Засгийн газрын өнөөдрийг хүртэл хийсэн ажлын үр дүнг өөртөө авах” гэж Монголын ард түмний зуу зуун жилийн түүх, өмч, хөрөнгийн асуудалд Засгийн газрын эрх ашгаа дээрд үзсэн нь Үндсэн хуулиа ноцтой зөрчсөн. Энэ үйлдэл нь өөрөө Засгийн газар огцрох үндэс болно гэж үзэж байна.
Иймээс Үндэсний Аюулгүй байдлын зөвлөлийн гишүүн та бүхэн гагцхүү ард түмний эрх ашгийг эрхэмлэн дээдлэх байр суурьнаас онцгой анхааралтай хандаж, Үндсэн хуулийн үзэл баримтлалд нийцээгүй эдгээр гэрээнүүдийг дэмжихгүй байхыг шаардаж байна.
Үндэсний соёмбо хөдөлгөөн
2007 оны долдугаар сарын 4
