Бодлогын Судалгааны Тэтгэлэгт Хөтөлбөр 2011

A- A A+
Бодлогын Судалгааны Тэтгэлэгт Хөтөлбөр 2011

2011 оны бодлогын судалгааны сэдэв

2011 оны Бодлогын судалгааны тэтгэлэгт хөтөлбөрийн хүрээнд дараах сэдвээр судалгаа хийх судлаач, судалгааны багуудыг урьж байна. Доорх сэдвүүд нь судалгааны хамрах хүрээ, ерөнхий чиглэлийг тодорхойлж байгаа бөгөөд судлаач өөрийн сонирхол, туршлагадаа тулгуурлан уг хүрээг нарийсган бодлогын тодорхой асуудалд төвлөрүүлэх шаардлагатай.   

  1. Иргэний нийгмийн оролцооны арга механизмууд

Төрийн үйл ажиллагааг ил тод, нээлттэй, хяналтай болгоход иргэд, иргэний нийгмийн байгууллагын оролцоог хангах механизмуудыг дэмжих, шаардлагатай эрх зүйн болон бусад түвшний өөрчлөлтүүдийг тодорхойлж, хэрэгжүүлэхэд чиглэсэн зөвлөмж боловсруулахад энэ бодлогын судалгааны зорилго оршиж байна. Судалгааг, тухайлбал, дараах тодорхой асуудалд төвлөрүүлж болно:

  • Иргэний нийгмийн хяналт, мониторингийн үр дүнг төрийн бодлогод тусгах арга зам
  • Төрийн үйл ажиллагаанд хяналт тавих онцгой чиг үүрэгтэй бие даасан байгууллагын дэргэдэх олон нийтийн зөвлөлийн статус, чиг үүрэг, хариуцлагын тогтолцоо
  • Төрийн үйлчилгээний байгууллагын шийдвэр гаргалтад үйлчлүүлэгч талын оролцоог хангах үүрэгтэй олон нийтийн зөвлөлийн статус, чиг үүрэг, хариуцлагын тогтолцоо
  • Мэргэжлийн холбоод зэрэг өөрөө удирдах байгууллагын статус, чиг үүрэг, хариуцлагын тогтолцоо
  • Төрийн чиг үүрэгт багтах ажил, үйлчилгээг гэрээгээр гүйцэтгэх төрийн бус болон хувийн хэвшлийн байгууллагыг сонгон шалгаруулах, гэрээ байгуулах үйл явц
  1. Нийгмийн бодлогын төлөвлөлт

Сүүлийн үед бодлого гаргах үе шатанд судалгаа шинжилгээний дүн, судлаач, иргэний нийгмийн  зөвлөмжийг ашиглах явдал нэмэгдэж буй ч хэрэгжилтэд үнэлгээ шинжилгээ хийх үндсэн дээр боловсронгуй болгож байх үйл явц төлөвшөөгүй байна. Энэ судалгаагаар нийгмийн бодлогын оновчтой байдал, үр нөлөөг үнэлэх, хэрэгжилтэд хяналт тавих аргачлал боловсруулан, бодлогын холбогдолтой шийдвэр гаргахад тогтмол хэрэглэдэг арга хэрэгсэл болгоход чиглэсэн зөвлөмж гаргах юм. Судалгааг дараах чиглэлээр нарийсган хязгаарлаж болно. Үүнд:

  • Тодорхой зорилтын үүднээс (жишээлбэл, ядуурлыг бууруулах) бодлогын үр нөлөөг үнэлэх аргачлал
  • Нийгмийн салбарын стратистик мэдээлэл  цуглуулах үйл явц
  • Нийгмийн бодлогод тодорхой зорилтот бүлгийн (жишээлбэл, хөгжлийн бэрхшээлтэй, шилжин суурьшигч) хэрэгцээ туссаныг үнэлэх аргазүй

Стратеги судлалын үндэсний хүрээлэнтэй хамтран зарлаж буй сэдвүүд

  1. Монголын эдийн засаг дахь төрийн оролцоо

Монгол Улсын эдийн засаг тэлж, төсвийн орлого, зарлага өсөх үйл явцыг дагаад эдийн засагт төрийн гүйцэтгэх үүрэг улам бүр нэмэгдэж байна. Гэтэл нөгөө талаас хүний эрүүл, аюулгүй орчинд амьдрах баталгаа алдагдаж, хүн амын амьжиргааны түвшинд  ахиц дэвшил ажиглагдахгүй байна. Судлаач үндэсний хөгжлийн бодлого, холбогдох эрх зүйн орчин, улсын төсвийн хуваарилалт болон Засгийн газрын мөрийн хөтөлбөр зэрэг бодлогын  баримт бичигт дүн шинжилгээ хийж, бусад улс орны туршлагыг судалсны үндсэн дээр эдийн засаг, нийгмийн хөгжлийн өнөөгийн нөхцөлд төрийн гүйцэтгэвэл зохих эн тэргүүний чиг үүргүүдийг оновчтой тодорхойлох, төсвийн бодлогыг уялдуулах санал боловсруулна.

  1. Эдийн засгийн аюулгүй байдлын шалгуур үзүүлэлт

Саяхан батлагдсан  “Үндэсний аюулгүй байдлын үзэл баримтлал” баримт бичигт улс орны эдийн засгийн аюулгүй байдлын тэргүүлэх чиглэлүүдийг тодорхойлоод байна. Энэ хүрээнд эдийн засгийн аюулгүй байдлын шалгуур үзүүлэлтүүдийг тодорхойлох, тэдгээрийг хэмжих арга зүйг боловсруулахад энэхүү судалгааны зорилго оршино.  Ингэхдээ эдийн засгийн аюулгүй байдлын тодорхой нэг чиглэл, салбараар судалгааг хязгаарлах боломжтой.

Судлаачид тавих шаардлага
Шаардлагууд нь бүх судлаач, үүний дотор багийн гишүүн тус бүрт хамааралтай.

Нийтлэг шаардлага

  1. Судалгааны нийт хугацааны туршид ажлын цагийн 50-иас илүү хувийг судалгаанд зориулах (ажил олгогчоос албан ёсоор зөвшөөрөл авсан байх)
  2. Магистр ба түүнээс дээш зэрэгтэй (дипломын баталгаат хуулбарыг хавсаргана)
  3. Мэргэжлээрээ 5-аас доошгүй жил ажилласан
  4. Судлах асуудлын хүрээ, салбарын бодлогын талаар зохих мэдлэгтэй байх
  5. Цаашид бодлогын судалгаа, нөлөөллийн ажил хийх хүсэл эрмэлзэлтэй
  6. Судалгаа, шинжилгээний ажлын зохих туршлагатай
  7. Гадаад хэл дээр судалгааны материал, бусад эх сурвалж ашиглах чадвартай
  8. Хувийн зохион байгуулалт, хариуцлага сайтай, төлөвлөсөн ажлаа хугацаанд нь гүйцэтгэдэг, багаар ажиллах чадвартай

Бодлогын судалгааны тэтгэлэгт хөтөлбөрт хамрагдах хугацаа, нөхцөл
Судалгааны үргэлжлэх хугацаа сэдвийн онцлогоос хамааран 5-10 сар байна. Судлаач энэ хугацаанд ННФ-аас зохиох бодлогын судалгааны аргазүйн сургалтуудад хамрагдахын зэрэгцээ тодорхой асуудлаар бодлогын хэлэлцүүлэг, ярилцлага зохион байгуулах, оролцох юм. Судлаач дотоод, гадаадын зөвлөхтэй хамтран ажиллах боломжтой.

Хөтөлбөрийн хүрээнд сар бүр олгох тэтгэлгийн хэмжээ өндөр байх ба судалгааны ажилтай холбоотой гарах бусад боломжит зардлуудыг хөтөлбөрөөс санхүүжүүлнэ. Мөн ННФ  бодлогын судалгаа, шинжилгээнийхээ тайланг хэвлүүлэх, нөлөөллийн ажлаа төлөвлөх, хэрэгжүүлэхэд дэмжлэг үзүүлэх болно.

Шалгаруулалтад бүрдүүлж ирүүлэх материал
Шалгаруулалтад дараах материалыг бүрдүүлж ирүүлэх ба судалгааны баг оролцож байгаа бол сүүлийн 4 зүйлийг багийн гишүүн тус бүрээр ирүүлэхийг хүсье:

  1. Хөтөлбөрт хамрагдах өргөдөл ( ННФ-аас боловсруулсан маягтын дагуу) ( DOC)   
  2. Хөтөлбөрт хамрагдах сонирхлоо илэрхийлсэн захидал. Уг хөтөлбөрт хамрагдах сэдэл шалтгаан, хөтөлбөрөөс хүлээж буй үр дүн, сэдвийн ач холбогдол (1 нүүр)
  3. Судалгааны төлөвлөгөө. Зарласан судалгааны сэдвийн хүрээнд нарийвчлан сонгосон бодлогын асуудлын томъёолол, үндэслэл, судалгааны зорилго ба зорилтууд, нарийвчилсан аргазүй, судалгааны ажлын ач холбогдол, гарах үр дүн (5-8 нүүр)
  4. Хөтөлбөрт хамрагдахыг дэмжиж байгаа тухай байгууллагын албан захидал. Судалгааны ажил нь байгууллагын зорилго, үйл ажиллагааны чиглэлтэй хэрхэн уялдаж байгаа, байгууллагын оролцоо дэмжлэг, ажлын цагийг бүтнээр болон 80-аас илүү хувийг судалгаанд зарцуулахыг зөвшөөрсөн зөвшөөрөл (1 нүүр)
  5. Хөтөлбөрт хамруулахыг дэмжсэн тодорхойлолт (ННФ-аас боловсруулсан маягтын дагуу 2 хүнээс) (DOC)
  6. Товч анкет
  7. Бүтээлийн жагсаалт
  8. Бичлэгийн загвар (5-10 хуудас). Үүнд судлаачийн бичсэн судалгааны тайлангийн хураангуй, нийтлэл байж болно.

Шалгаруулалтын материалыг 2011 оны 4 дүгээр сарын 6-ны Лхагва гаригийн 16:00 цаг хүртэл хүлээж авна. Материалыг ННФ-ын байранд биеэр болон шуудангаар хүргэж болохоос гадна цахим шуудангийн [email protected]  хаягаар ирүүлж болно. Шуудангаар илгээх тохиолдолд материал хүлээж авах сүүлийн өдөрт багтаж ННФ-д хүрсэн байхаар төлөвлөхийг хүсье. Хугацаа хэтэрсэн материалыг хүлээж авах боломжгүй бөгөөд задлалгүй буцаах болно.  

Судалгааны ажлын төлөвлөгөө боловсруулах удирдамж (PDF)

Хөтөлбөрийн холбогдолтой мэдээллийг нэгдсэн байдлаар хүргэх ба Мэдээлэл өгөх уулзалтыг 2011 оны 3 дугаар сарын 9-ний Лхагва гариг, 3 дугаар сарын 17-ны Пүрэв гаригийн 16:30 цагаас ННФ-ын байранд хийнэ.  Ганцаарчилсан зөвөлгөө өгөх, утас, цахим шуудангаар нэмэлт мэдээлэл, лавлагаа өгөх боломжгүй тул хүлцэл өчье.