Ардчилсан нам ард түмэнд Таван толгойг өгөх болжээ (Өдрийн сонин, 2008-01-10)

Ардчилсан нам  ард түмэнд Таван толгойг өгөх болжээ (Өдрийн сонин, 2008-01-10)

Ардчилсан намын ерөнхий нарийн бичгийн дарга Д.Дорлигжав, УИХ-ын гишүүн С.Ламбаа нар энэ сарын 8-нд болсон УИХ дахь тус намын Зөвлөлийн гишүүд, намын удирдлагатай хамтран хийсэн өргөтгөсөн хуралдааны талаар мэдээлэл хийлээ.

Хуралдаанаас Таван тол­гойн орд газрыг төрийн мэдэлд бүрэн шилжүүлэх гэж байгаа­тай холбогдуулан байгалийн баялаг ард түмний өмч гэдэг үүднээс иргэдэд үр шимийг нь хувьцаа хэлбэрээр хүртээх нь зөв хэмээн долоон сарын өмнө илэрхийлж байсан байр сууриа баталгаажуулж эрх зүйн орчныг бүрдүүлэх хуулийн төслийг боловсруулах ажлын хэсгийг УИХ-ын гишүүн Н.Бат­баяраар ахлуулан бай­гуу­ла­хаар тогтжээ. Эрх зүйн орчныг бүрдүүлэх санаачилгыг гаргас­наараа АН ард түмэнд Таван толгойг “Эрдний хувь” болгон өгнө гэсэн амлалтдаа хүрэх нь.

Багануур дүүрэгт олон хүн архинд хордож амь насаа алдсан эмгэнэлт явдлыг УМХГ үүргээ биелүүлж чадаагүй тул АН-ын зөвлөлөөс Засгийн газарт тухайн байгууллагын удирдлагатай хариуцлага тоо­цох асуудлыг тавих нь зөв хэмээн үзжээ. Мөн хоёр нисдэг тэрэг осолдсонтой холбог­дуулан сайдуудтай хариуцлага тооцох, сүйрсэн нисдэг тэргэ­ний үнийг хэн төлж улсыг хохиролгүй болгох, үүнд хол­боотой ИНЕГ-ын удирдлагад ямар арга хэмжээ авсан талаар Ерөнхий сайдаас асууж лав­лахаар тогтжээ.

АН-ын УИХ дахь зөвлөлийн үйл ажиллагааг хэдийгээр 2004 онд цөөнх болсон ч амлалтаа сайн биелүүлснийг сайшааж, Зөвлөлийн гишүү­дийг энэ оны УИХ-ын сонгуульд дахин нэр дэвшихийг санал болгов.

“УИХ нэр дэвшигчдийн хэдэн хувь нь эмэгтэйчүүд байх вэ” гэсэн асуултад “АН дотоод­доо Үндэсний зөвлөлдөх хо­роонд 58 эмэгтэй гишүүн бай­на гэсэн квоттой. Төрд хэдэн эмэгтэй сонгогдох нь сон­гогч­дын мэдэлд байдаг тул сон­гуульд квот тогтооно гэдэг нь их хэцүү. Сонгогдох магад­лалтай хүнийхээ нэрийг дэв­шүүлэх шаардлагатай болох юм. Ер нь манай нам эмэг­тэйчүүдийн нэрийг дэвшүүлнэ” гэж хариулж байв. Харин улс төрийн өндөр албан тушаалын томилгоонд квот тогтоох юм бол хэрэгжүүлэх боломжтой гэж тэд хэллээ. Тухайлбал Засгийн газрын танхимын ги­шүү­дийн тодорхой хувь нь эмэгтэй хүн байна. Энэ жишгээр дэд сайд, Төрийн нарийн бич­гийн дарга хэмээх улс төрийн өндөр албан тушаалд эмэгтэй­чүүдийг томилдог байх нь амьдрал хэрэгжих магадлал өндөр гэж тэд байр сууриа илэрхийлсэн юм.