Монгол Улс Улс төрийн намын тухай хууль /шинэчилсэн найруулга/ 1 -ийг 2005 оноос хойш 18 жилийн дараа шинэ үзэл баримтлалаар 2023 оны 7 дугаар сарын 07-ны өдөр баталсан. Хууль 2024 оноос эхлэн хэрэгжиж байгаа ч одоогоор бүрэн хэмжээнд хэрэгжээгүй байгаа билээ. Учир нь Улс төрийн намын тухай хууль /шинэчилсэн найруулга/-ийг дагаж мөрдөх тухай хууль 2 -ийн хоёрдугаар заалтын хэрэгжилтийг 2025 оны 12 дугаар сарын 31-ны өдрийг хүртэл дахин сунгаад байна. Ийнхүү хууль бүрэн хэрэгжиж эхлээгүй байхад Улс төрийн намын тухай хууль /шинэчилсэн найруулга/-д нэмэлт өөрчлөлт оруулах хуулийн төсөл /цаашид нэмэлт, өөрчлөлтийн хуулийн төсөл гэх/-ийг боловсруулж олон нийтээс санал авахаар 2025 оны 5 дугаар 21-ны өдөр www.d-parliament.mn сайтад байршуулжээ. 3 Энэ төсөл нь 2019 оны Үндсэн хуулийн нэмэлт өөрчлөлт болон түүний хүрээнд шинэчлэн баталсан хуулийн үзэл баримтлалд нийцэхгүй байх бөгөөд шинэчлэлийн гол ололт болох улс төрийн намын санхүүжилтийг хяналтыг сулруулах, төрийн санхүүжилт олгох механизмын шударга байдлыг алдагдуулах үр дагавартай байна.
